టీమిండియా మాజీ కెప్టెన్ మహేంద్రసింగ్ ధోని సినీ నిర్మాణ రంగంలోకి అడుగుపెట్టబోతున్నారని గత కొద్ది రోజులుగా సోషల్ మీడియాలో వార్తలు హ‌ల్‌చ‌ల్ చేస్తున్న విషయం తెలిసిందే. అయితే ఈ వార్తలకి పులిస్టాప్ పెడుతూ ఎట్టకేలకు సినీ నిర్మాణ రంగంలోకి అడుగు పెట్టారు మహేంద్రసింగ్ ధోని. దీపావళి పర్వదినాన భార్య సాక్షి సింగ్ ధోనీతో కలిసి ” ధోని ఎంటర్టైన్మెంట్” పేరిట నిర్మాణ సంస్థను ప్రారంభించారు.
ఈ సంస్థకు ధోనీ భార్య సాక్షి సింగ్ మేనేజింగ్ డైరెక్టర్ గా వ్యవహరిస్తున్నారు. తన నిర్మాణ సంస్థకి “డి ఎంటర్టైన్మెంట్” అనే పేరుని పెట్టారు ధోని. తన మొదటి సినిమాని తమిళ్ లో నిర్మించనున్నట్లు ప్రకటించారు. ఈ సినిమాకి ధోని భార్య సాక్షి కథని అందించగా.. రమేష్ తమిళమని దర్శకత్వం వహించబోతున్నాడు. ఫ్యామిలీ ఎంటర్టైనర్ గా ఈ మూవీని తెరకెక్కించనున్నట్టు సమాచారం.
ఈ చిత్రానికి సంబంధించిన ఇతర వివరాలను త్వరలోనే ప్రకటిస్తామని వెల్లడించారు. తమిళనాడు ధోనీకి విపరీతమైన క్రేజ్ ఉండడంతో ధోని ఎంటర్టైన్మెంట్ బ్యానర్ పై వరుస తమిళ సినిమాలు వచ్చే అవకాశాలు ఉన్నాయంటున్నారు సంస్థ ప్రతినిధులు. ఇక ఈ సంస్థ తమిళ్ తో పాటు తెలుగు, హిందీ, కన్నడ భాషల్లో సినిమాలు నిర్మించే ఆలోచనలో ఉన్నట్లు తెలుస్తోంది. ఇక గ్రౌండ్ లో బ్యాట్ తో వీర విహారం చేసే ధోని సినిమా రంగంలో ఎలాంటి విజయాలను సాధిస్తాడో వేచి చూడాలి.