ఇటీవల యశోద సినిమాతో భారీ విజయాన్ని నమోదు చేసిన టాలెంటెడ్ బ్యూటీ సమంత.. ప్రస్తుతం శాకుంతలం సినిమాతో మరోసారి ప్రేక్షకుల ముందుకు వచ్చేందుకు సిద్ధమవుతోంది. కొత్త సంవత్సరం సందర్భంగా ఈ సినిమా విడుదల తేదీని ప్రకటించింది చిత్ర బృందం. గుణశేఖర్ దర్శకత్వం వహించిన ఈ ఎపిక్ మైథాలజికల్ డ్రామా చిత్రం తాజాగా రిలీజ్ డేట్ ను ఫిక్స్ చేసుకుంది. అయితే ఈ ప్రాజెక్టు 2020 అక్టోబర్ లో ప్రకటించినప్పటికీ.. పాండమిక్ తదితర కారణాలతో వాయిదా పడుతూ వస్తోంది.
ఇక షూటింగ్ ఎప్పుడో కంప్లీట్ అయినప్పటికీ 3D వెర్షన్ కోసం జాప్యం జరిగినట్లు తెలుస్తోంది. ఎట్టకేలకు విడుదల తేదీని ప్రకటించింది మూవీ యూనిట్. ఈ చిత్రం ప్రపంచవ్యాప్తంగా 2023 ఫిబ్రవరి 17న ప్రేక్షకుల ముందుకి రానుంది. దేవ్ మోహన్, మోహన్ బాబు, మధుబాల, గౌతమి, అనన్య నాగళ్ళ, ప్రకాష్ రాజ్ తదితరులు ఈ చిత్రంలో కీలక పాత్రలు పోషించారు.
ఈ సినిమా తెలుగు, హిందీ, తమిళ్, కన్నడ, మలయాళం భాషల్లో ప్రేక్షకుల ముందుకు రానుంది. కాళిదాసు రచించిన సంస్కృత నాటకం అభిజ్ఞాన శాకుంతలం ఆధారంగా ఈ చిత్రాన్ని రూపొందించారు. శకుంతల, దుష్యంత మహారాజుల మధ్య ఉన్న అజరామరమైన ప్రయాణ గాథ నేపద్యంలో ఈ సినిమా సాగుతుంది. శకుంతల పాత్రను సమంత పోషించగా.. దుష్యంత మహారాజు పాత్రలో దేవ్ మోహన్ నటించారు.
అత్యంత ప్రతిష్టాత్మకంగా నిర్మిస్తున్న ఈ చిత్రానికి నీలిమ గుణ, దిల్ రాజు సమర్పకులుగా వ్యవహరిస్తున్నారు. అలాగే ఈ చిత్రానికి మణిశర్మ సంగీతం అందిస్తుండగా.. సాయి మాధవ్ బుర్ర మాటలు రాశారు. “శాకుంతలం వీక్షించండి.. 3d వెర్షన్ లో సైతం” అంటూ సమంత, దేవ్ మోహన్ రొమాంటిక్ పిక్ తో కూడిన రిలీజ్ పోస్టర్ ను పోస్ట్ చేశారు.