కార్తికేయ గుమ్మకొండ కథానాయకుడిగా నటిస్తున్న సినిమా ‘బెదురులంక 2012’. ఇందులో ‘డీజే టిల్లు’ ఫేమ్ నేహా శెట్టి కథానాయిక. క్లాక్స్ దర్శకత్వం వహిస్తున్నారు. లౌక్య ఎంట‌ర్‌టైన్‌మెంట్స్‌ పతాకంపై ప్రొడక్షన్ నంబర్ 3గా రవీంద్ర బెనర్జీ ముప్పానేని నిర్మిస్తున్నారు. ఈ చిత్రానికి సి. యువరాజ్ చిత్ర సమర్పకులు. ఉత్తమ తెలుగు చిత్రంగా జాతీయ పురస్కారం అందుకున్న ‘కలర్ ఫొటో’ నిర్మించిన బెన్నీ ముప్పనేని నిర్మిస్తున్న తాజా చిత్రమిది.
నేచురల్ స్టార్ నాని ఈ రోజు ‘బెదురులంక 2012’ ఫస్ట్ లుక్, మోషన్ పోస్టర్ విడుదల చేశారు. ఈ ఫస్ట్ లుక్ లో కార్తికేయ స్టైలీష్ లుక్ లో కనిపిస్తున్నాడు. కోపంతో చూస్తూ.. చేతిలో రెండు ఉంగరాలు కూడా ఉన్నాయి. ఈ సినిమాలో ఈ ఉంగరాలతో ఎదైనా ఉంటుందా అని తెలియాల్సి ఉంది. కాగా బెదురులంక 2012 ను విభిన్నంగా తెరకెక్కిస్తున్నట్టు మేకర్స్ చెబుతున్నారు. ఒక పల్లెటూరిలో 2012 యుగాంతం నేపథ్యంలో జరిగే కథతో ఈ సినిమాను చేసినట్టు నిర్మాత రవీంద్ర బెనర్జీ ముప్పానేని అన్నారు.
శరవేగంగా జరుపుకుంటున్న షూటింగ్ చివరి దశలో ఉంది. యానాం, కాకినాడ, గోదావరి పరిసర ప్రాంతాల్లో షూటింగ్ చేశారు. ఈ సినిమా కోసం మెలోడీ బ్రహ్మ మణిశర్మ అద్భుతమైన బాణీలు అందించారని టీం తెలిపారు. అంతే కాకుండా ఈ సినిమాలో ఒక పాటను సిరివెన్నెల సీతారామశాస్త్రి రాశారట. డ్రామా, కామెడీ, యాక్షన్, ఎమోషన్స్ సినిమాలో మెయిన్ హైలైట్స్ గా ఉంటాయని, అవి ప్రేక్షకులను మెప్పిస్తాయని మేకర్స్ ధీమా వ్యక్తం చేస్తున్నారు.