టాలీవుడ్ లో సొంతంగా పైకి వచ్చిన హీరోలలో నిఖిల్ సిద్ధార్ద్ ఒకరు. హ్యాపీడేస్ చిత్రంతో హీరోగా పరిచయమైన నిఖిల్.. ఇటీవల చందు మొండేటి దర్శకత్వంలో తెరకెక్కిన కార్తికేయ 2 చిత్రం ద్వారా భారీ విజయాన్ని నమోదు చేసుకున్న విషయం తెలిసిందే. ఈ సినిమాతో పాన్ ఇండియా హీరోగా కూడా పేరు పొందారు నిఖిల్ సిద్ధార్ద్. కెరీర్ మొదటి నుంచి వైవిధ్యమైన సినిమాలు చేస్తూ తనకంటూ ఓ ప్రత్యేక ఇమేజ్ ని సంపాదించుకున్నాడు నిఖిల్.
కార్తికేయ సినిమా సక్సెస్ నుంచి ఇంకా బయటకు రాకుండానే నిఖిల్ నటించిన 18 పేజీస్ సినిమా విడుదల అయింది. సుకుమార్ కథ అందించిన ఈ చిత్రాన్ని పల్నాటి సూర్య ప్రతాప్ డైరెక్ట్ చేశాడు. ఈ సినిమా కూడా విజయాన్ని అందుకోవడంతో నిఖిల్ వరుస విజయాలను ఎంజాయ్ చేస్తున్నాడు. తాజాగా అభిమానులకు కృతజ్ఞతలు తెలిపేందుకు ట్విట్టర్ లో ఫ్యాన్స్ తో ఇంటరాక్ట్ అయ్యాడు హీరో నిఖిల్.
ఈ సందర్భంగా అభిమానులతో మాట్లాడుతుండగా.. ఒక నెటిజన్ నుంచి నిఖిల్ కి కార్తికేయ 3 సినిమా గురించి ప్రశ్న ఎదురైంది. ఈ ప్రశ్నకు నిఖిల్ సమాధానం చెబుతూ.. “కార్తికేయ 3 ఖచ్చితంగా ఉంటుంది. ఈసారి 3డి లో మరో అద్భుతమైన పాయింట్ ని డైరెక్టర్ చందు మొండేటి వినిపించారు” అని కార్తికేయ 3 సినిమా గురించి అప్డేట్ ఇవ్వడంతో అభిమానులు సంతోషం వ్యక్తం చేస్తున్నారు. త్వరలోనే ఈ మూవీ అఫీషియల్ అనౌన్స్‌మెంట్ వచ్చే అవకాశం ఉంది.