Director Ranjith : హేమ కమిటీ నివేదిక మలయాళ ఇండస్ట్రీని కుదిపేస్తున్న సంగతి తెలిసిందే. అయితే ఇందులో డైరెక్టర్ రంజిత్ పై ఆరోపణలు వెల్లువెత్తాయి. ఆయన ఇదంతా ఓ వర్గం వారు తనపై కావాలని చేస్తున్న కుట్ర, నిజమే గెలుస్తుంది అంటూ సమాధానం చెప్పే ప్రయత్నం చేసినా ఎవ్వరూ వినే పరిస్థితులు లేవు. దీంతో ఇప్పటికే పలు ఇబ్బందులను ఎదుర్కొంటున్న డైరెక్టర్ రంజిత్ తాజాగా ఈ లైంగిక వేధింపుల కేసులో అరెస్ట్ కాకుండా ప్రయత్నాలు మొదలు పెట్టి అలర్ట్ అయ్యారు.
ముందస్తు బెయిల్ కు ప్రయత్నాలు
లైంగిక వేధింపుల కేసుకు సంబంధించి మలయాళ సినీ దర్శకుడు రంజిత్ మంగళవారం ముందస్తు బెయిల్ పిటిషన్‌పై కేరళ హైకోర్టును ఆశ్రయించారు. 2009లో తనను కొచ్చిలోని ఒక ఫ్లాట్‌కి పిలిపించారని, అక్కడ రంజిత్ తనతో అసభ్యంగా ప్రవర్తించాడని ఓ బెంగాలీ నటుడు వెల్లడించిన నేపథ్యంలో అనేక వర్గాల నుండి అతనిపై ఒత్తిడి పెరిగింది. దీంతో రంజిత్ గత నెలలో కేరళ రాష్ట్ర చలనచిత్ర అకాడమీ ఛైర్మన్ పదవి నుంచి వైదొలిగారు. అయితే మలయాళ చిత్ర పరిశ్రమలో మహిళలు ఎదుర్కొంటున్న విపరీతమైన లైంగిక దోపిడీ సమస్యలతో వ్యవహరించే జస్టిస్ హేమ కమిటీ నివేదికను ప్రచురించిన కొద్ది రోజుల తర్వాత రంజిత్‌కు కష్టాలు మొదలయ్యాయి. నటుడు చేసిన ఇమెయిల్ ఫిర్యాదు ఆధారంగా ఎర్నాకులం టౌన్ పోలీస్ స్టేషన్‌లో అతనిపై కేసు నమోదైంది. అయితే రంజిత్ తన బెయిల్ పిటిషన్‌లో తనపై వచ్చిన ఆరోపణలన్నింటినీ కొట్టిపారేశాడు. 15 సంవత్సరాల తర్వాత తనను ఇంప్లీడ్ చేస్తున్నాడని చెప్పాడు. తనను పదవి నుంచి తప్పించాలని అకాడమీలోని ఓ వర్గం తనపై కుట్ర పన్నుతున్నారని ఆరోపించారు.
.jpg?$p=8a7b7b1&f=16x10&w=852&q=0.8)
9 మంది సినీ ప్రముఖులపై కేసు
సినీ పరిశ్రమలోని మహిళలు లైంగిక డిమాండ్లు, లైంగిక వేధింపులు, లింగ వివక్ష, పని ప్రదేశాల్లో భద్రత లేకపోవడం, సరిపడా మౌలిక సదుపాయాలు, వేతన వ్యత్యాసాలు వంటి అనేక సమస్యలను ఎదుర్కొంటున్నారని హేమ కమిటీ నివేదిక వెల్లడించింది. ఇక ఈ క్రమంలోనే మహిళా నటీనటులు ఫిర్యాదు చేయడంతో ముఖేష్, సిద్ధిక్, జయ సూర్య, ఎడవెల బాబు, మణియన్ పిళ్లై రాజు, దర్శకుడు రంజిత్, వీకే ప్రకాష్, ప్రొడక్షన్ ఎగ్జిక్యూటివ్‌లు విచ్చు, నోబెల్‌లతో సహా తొమ్మిది మంది సినీ ప్రముఖులపై ఇప్పటి వరకు ఎఫ్‌ఐఆర్‌లు నమోదయ్యాయి.
బాధితులచే దోపిడీదారులుగా పేర్కొనబడిన వారిలో ముఖేష్ కూడా ఒకరు. అతను ముందస్తు బెయిల్ కు అప్లై చేసుకోగా, బుధవారం వరకు అరెస్టు నుండి తాత్కాలిక ఉపశమనం పొందారు. అతని పిటిషన్ పై మంగళవారం దిగువ కోర్టులో విచారణ జరిగింది. బాధితుల నుంచి వాంగ్మూలాలు తీసుకునేందుకు నలుగురు మహిళా ఐపీఎస్ అధికారులతో కూడిన ఏడుగురు సభ్యుల పోలీసు విచారణ బృందాన్ని విజయన్ ప్రభుత్వం నియమించింది. ఇప్పటి వరకు దోపిడీదారులలో/నిందితులలో ఎవరికీ విచారణ బృందం ముందు హాజరుకావాలని సమన్లు పంపలేదు. దీంతో బాధితులకు అండగా ఉంటామని చెబుతున్నప్పటికీ విజయన్ ప్రభుత్వం అక్రమార్కులతో చేతులు కలిపిందని బీజేపీ, కాంగ్రెస్ ఆరోపించాయి.