Double Ismart: పూరి జగన్నాథ్ రామ్ కాంబినేషన్లో వస్తున్న సినిమా డబల్ ఇష్మార్ట్. ఇదివరకే వీరిద్దరి కాంబినేషన్లో ఇస్మార్ట్ శంకర్ అనే సినిమా వచ్చింది. చాలా రోజుల తర్వాత ఈ సినిమాతో పూరి ఒక సక్సెస్ చూశాడు. ఈ సినిమాకి మల్టీప్లెక్స్ లో మొదట నెగిటివ్ టాక్ వచ్చినా కూడా చాలా సింగిల్ స్క్రీన్ థియేటర్స్ లో ఆడియన్స్ ఈ సినిమాకి బ్రహ్మరథం పెట్టారు. ఈ సినిమా తర్వాత పూరి చేసిన సినిమాలన్నీ కూడా డిజాస్టర్ గానే మిగిలాయి. ఈ సినిమా తర్వాత పూరి కనెక్ట్స్ నుంచి మెహబూబా, రొమాంటిక్ సినిమాలు వచ్చాయి. ఆ తర్వాత పూరి దర్శకత్వంలో లైగర్ అనే సినిమా కూడా వచ్చింది.
ఫోకస్ మిస్టర్ బచ్చన్ వైపు షిఫ్ట్
లైగర్ సినిమా గురించి ప్రత్యేకంగా చెప్పాల్సిన అవసరం లేదు. ఎన్నో అంచనాల మధ్య వచ్చిన ఈ సినిమా మినిమం ఎక్స్పెక్టేషన్స్ కూడా రీచ్ కాలేదు. ఈ సినిమాతో పాన్ ఇండియా రేంజ్ లో హిట్ కొడతారని అందరూ ఊహించారు. కానీ ఈ సినిమా భారీ నష్టాలను చవిచూసింది. ఇకపోతే ఇప్పుడు అందరు చూపులు కూడా డబల్ ఇస్మార్ట్ శంకర్ సినిమా పైన ఉన్నాయి. ఆగస్టు 15న రిలీజ్ అవుతున్న ఈ సినిమా కోసం చాలామంది వెయిట్ చేస్తున్నారు. అయితే ఈ సినిమాకి సంబంధించి ఇప్పటివరకు సరైన ప్రమోషన్ కూడా చేయలేదు. మరోవైపు రవితేజ హరీష్ శంకర్ కాంబినేషన్లో వస్తున్న మిస్టర్ బచ్చన్ సినిమా కూడా రిలీజ్ కి రెడీ అవుతుంది. ఆ చిత్ర యూనిట్ ఇప్పటివరకు సినిమా నుంచి మూడు పాటలను ఒక టీజర్ రిలీజ్ చేసింది. ఇవన్నీ కూడా విపరీతంగా ఆకట్టుకుంటున్నాయి. ఇప్పుడు మెల్లగా డబల్ ఇస్మార్ట్ శంకర్ సినిమా నుంచి ఫోకస్ మిస్టర్ బచ్చన్ వైపు షిఫ్ట్ అవుతుంది.
ఇప్పుడు డబల్ ఇస్మార్ట్ శంకర్ చిత్ర యూనిట్ జాగ్రత్త పడాల్సి ఉంది. వాస్తవానికి ఈ సినిమాకి సంబంధించిన ట్రైలర్ రేపు రిలీజ్ చేస్తున్నట్లు అధికారికంగా ప్రకటించారు. అయితే ఈ సినిమా నుంచి ఇదివరకే మూడు పాటలను రిలీజ్ చేశారు. అయితే ఈ పాటలు మణిశర్మ అందించిన కూడా అవి ఆకట్టుకునే స్థాయిలో లేవు అనేది చాలామంది ఉద్దేశం. పూరి జగన్నాథ్ సినిమా రిలీజ్ అవుతుందేనంటే ప్రమోషన్స్ చాలా ఫాస్ట్ గా జరుగుతుంటాయి. కానీ ఈ సినిమాకి సంబంధించి అసలు ప్రమోషన్స్ కూడా పెద్దగా స్టార్ట్ చేయలేదు. ఇంకా పూరి జగన్నాథ్ ముంబై నుంచి రాలేదు అని వార్తలు కూడా వస్తున్నాయి. ఏదేమైనా ఒక మంచి సినిమా చేయడం ఎంత అవసరమో, ఆ సినిమాని జనాల్లోకి తీసుకెళ్లడం కూడా అంతే అవసరం.
ఈ సినిమా ట్రైలర్ను రేపు వైజాగ్ లో రిలీజ్ చేస్తున్నట్లు అనౌన్స్ చేశారు కాబట్టి కచ్చితంగా టీం అక్కడికి వచ్చే అవకాశం ఉంది. అయితే వీళ్లకు డిస్ట్రిబ్యూటర్స్ తో ఉన్న సమస్యలను తీర్చి సినిమా ప్రమోషన్స్ ను మొదలు పెడితే ఈ సినిమా గురించి కూడా చాలామందికి తెలిసి అవకాశం ఉంది. లేదంటే సినిమా ఎప్పుడొచ్చి ఎప్పుడు వెళ్ళిపోతుందో అనేటట్లే ఉంటుంది. ఈ సినిమా సక్సెస్ అనేది పూరి జగన్నాథ్ కి చాలా అవసరం. మరోవైపు రామ్ కూడా హిట్ సినిమా చేసి చాలా రోజులు అయిపోయింది.