Varalakshmi Sarath Kumar : హీరోయిన్లు పెళ్లి జరిగే దాకా సినిమాలు బాగానే చేస్తారు. కానీ చాలామంది పెళ్లి తరువాత ఇండస్ట్రీకి పలు కారణాలతో దూరం అవుతారన్న విషయం తెలిసిందే. ఇప్పుడిప్పుడే ఆ ట్రెండ్ మారుతోంది. ఈ నేపథ్యంలోనే కొత్త పెళ్లి కూతురు వరలక్ష్మిపై పడింది అందరి కన్ను. ఆమె పెళ్లయ్యాక ఇంటి పేరు మార్చుకుంటుందా? సినిమాలు చేయడం మానేస్తుందా? అనే అనుమానాలు నెలకొన్నాయి. అయితే తాజాగా జరిగిన మీడియా మీట్ లో వరలక్ష్మి భర్త ఈ ప్రశ్నలకు ఊహించని సమాధానం ఇచ్చారు.
నికోలాయ్ నుంచి ఊహించని సమాధానం
నటి వరలక్ష్మి శరత్‌కుమార్, తన ప్రేమికుడు, ముంబైకి చెందిన వ్యాపారవేత్త నికోలాయ్ సచ్‌దేవ్ జూలై 3న టాలాండ్‌లో అంగరంగ వైభవంగా వివాహం చేసుకున్నారు. అనంతరం జరిగిన వెడ్డింగ్ రిసెప్షన్‌కు కోలీవుడ్ సినీ పరిశ్రమకు చెందిన పలువురు ప్రముఖులు హాజరై దంపతులకు శుభాకాంక్షలు తెలిపారు. వివాహానంతరం భర్తతో కలిసి హనీమూన్‌కు వెళ్లి వచ్చిన వరలక్ష్మి తాజాగా తన తండ్రి, భర్తతో మీడియాను కలిశారు.
కార్యక్రమం ప్రారంభమైన తర్వాత వరలక్ష్మి భర్త నికోలాయ్ సచ్‌దేవ్ విలేకరులతో మాట్లాడుతూ.. నాకు తమిళం చాలా తక్కువ తెలుసు. కొన్ని పదాలు మాత్రమే నేర్చుకున్నాను. మరికొన్ని నెలల్లో తమిళం నేర్చుకుంటాను. ముందుగా నేను నా గురించి చెప్పాలనుకుంటున్నాను. నా పేరు నికోలాయ్ సచ్‌దేవ్. ఈ అందమైన భార్య వరలక్ష్మి. పెళ్లి కోసం నా భార్య సంప్రదాయ పేరు వరలక్ష్మి శరత్‌కుమార్‌ను మార్చుకోవాల్సిన అవసరం లేదు. వరలక్ష్మి శరత్‌కుమార్ సచ్‌దేవ్ అని చేర్చడం మంచిదని నా అభిప్రాయం. నేను ఎల్లప్పుడూ నా భార్య కలలకు మద్దతు ఇవ్వాలనుకుంటున్నాను. నా విషయానికొస్తే, నేను నా భార్య మొదటి ప్రేమను కాదు. సినిమా అనేది ఆమె మొదటి ప్రేమ. అందుకే పెళ్లయ్యాక కూడా నటిస్తూనే ఉంటానని ముందే చెప్పింది. ఆమె తండ్రి శరత్‌కుమార్‌తో పాటు నేనూ 100 శాతం సహకారం అందిస్తాం. మీరు కూడా సహకరించాలని కోరుతున్నాను” అంటూ చెప్పుకొచ్చారు.
జర్నలిస్టులకు దగ్గరుండి వడ్డించిన నికోలాయ్
భర్త మాట్లాడాక విలేకరులతో మాట్లాడిన వరలక్ష్మి అందరికీ కృతజ్ఞతలు తెలిపారు. పెళ్లి తర్వాత కలుద్దాం అని నాన్న కూడా చెప్పారు. కానీ ఆ అవకాశం రాలేదు. ఇప్పుడే అవకాశం వచ్చింది. అందుకే మేము మిమ్మల్ని కలవడానికి వచ్చాము. నా భర్త చెప్పినట్టు ఆయన నా ప్రేమ. కానీ సినిమా నా జీవితం అని మీకందరికీ తెలుసు. అలాగే పెళ్లి తర్వాత చాలా మంది సినిమాల్లో నటిస్తారా? అని నన్ను అడిగారు. దానికి ఆయన ఆల్రెడీ సమాధానం చెప్పారు. పెళ్లి తర్వాత తప్పకుండా నటిస్తాను” అంటూ పెళ్లి తరువాత సినిమాల గురించి క్లారిటీ ఇచ్చింది. ఈ సమావేశం అనంతరం జర్నలిస్టులందరికీ మటన్ బిర్యానీ, చికెన్ 65 వంటి విందు భోజనం వడ్డించగా.. నికోలాయ్ మాత్రం ఎలాంటి బేధం చూపకుండా జర్నలిస్టులకు భోజనం వడ్డించి అందరినీ ఆశ్చర్యానికి గురి చేయడం గమనార్హం. దీంతో ప్రస్తుతం అందరూ వరలక్ష్మి భర్త నికోలాయ్ గురించే మాట్లాడుకుంటున్నారు.