తెలుగు బడా ప్రొడ్యూసర్ దిల్ రాజు ఫ్యామిలీ నుంచి హీరోగా ఎంట్రీ ఇచ్చిన ఆశిష్ కి కష్టాలు తప్పట్లేదు. కెరీర్ మొదటి నుంచి స్టార్ గా నిలదొక్కుకోవాలని కష్టపడుతున్న ఈ యంగ్ హీరో తాజాగా లవ్ మీ అనే హారర్ లవ్ స్టోరీ తో థియేటర్లలోకి వచ్చాడు. కానీ ఈ మూవీకి ఆశించిన ఫలితం దక్కలేదు. అసలే ఈ మూవీ తీవ్ర నష్టాల్లో ఉంటే మరోవైపు శాటిలైట్ డీల్స్ విషయంలో మరో దెబ్బ పడినట్టుగా తెలుస్తోంది. ఇంతకీ ఈ మూవీకి వచ్చిన సమస్య ఏంటి? అనే వివరాల్లోకి వెళ్తే…
థియేట్రికల్ రన్ ఫెయిల్… ఎఫెక్ట్ అక్కడ పడింది
వైష్ణవి చైతన్య, ఆశిష్ జంటగా నటించిన హర్రర్ మూవీ లవ్ మీ. కిరణ్ భీమవరం దర్శకత్వంలో తెరకెక్కిన ఈ డార్క్ థ్రిల్లర్ మూవీని దిల్ రాజు, శిరీష్ సమర్పణలో హర్షిత్ రెడ్డి, హర్షిత, నాగ మల్లిడి సంయుక్తంగా నిర్మించారు. ఈ మూవీకి ఏకంగా ఆస్కార్ విన్నింగ్ మ్యూజిక్ డైరెక్టర్ కీరవాణి సంగీతం అందించడం విశేషం. ఎలాగైనా ఈ మూవీతో కెరీర్ లో మొదటి విజయాన్ని తన ఖాతాలో వేసుకోవాలనుకున్నాడు ఆశిష్. అందుకే చాలా గ్యాప్ తీసుకుని ఇప్పుడు ట్రెండ్ అవుతున్న హారర్ మూవీతో ప్రయత్నం చేశాడు.
లవ్ మీ మూవీ ఫస్ట్ పోస్టర్ తోనే అందరి దృష్టిని ఆకర్షించింది. మంచి బజ్ తో బిజినెస్ కూడా బాగానే జరిగింది. ఈ మూవీకి వరల్డ్ వైడ్ గా థియేట్రికల్ బిజినెస్ 6 కోట్లు జరిగింది. అంటే ఆశిష్ స్థాయికి మించిన బిజినెస్ జరిగింది. అలాగే డిజిటల్ గా 5 కోట్ల బిజినెస్ జరిగింది. కానీ థియేటర్లలో ఈ మూవీకి నెగిటివ్ టాక్ రావడంతో ఆశించిన విధంగా ఆడలేదు. మొత్తంగా ఈ మూవీ థియేటట్రికల్ రికవరీ కేవలం 2 కోట్లు మాత్రమే రావడం గమనార్హం. నిర్మాతలు భారీ నష్టాలను ఎదుర్కొంటున్నారు.
మరో సమస్య
అసలే ఈ మూవీ ఆశించిన విధంగా ఆడలేదు అనుకుంటుంటే నిర్మాతలకు మరింత నిరాశను కలిగించే పరిస్థితులు ఏర్పడ్డాయి. మూవీకి ఇప్పుడున్న సమస్య ఏమిటంటే ఈ మూవీ శాటిలైట్ డీల్ ఇంకా పెండింగ్ లోనే ఉన్నట్టుగా తెలుస్తోంది. థియేటర్లలో లవ్ మీ మూవీకి దారుణమైన రెస్పాన్స్ రావడంతో శాటిలైట్ డీల్స్ కుదుర్చుకోవడానికి ఎవ్వరూ ముందుకు రావట్లేదని ఫిలింనగర్ వర్గాల్లో టాక్ నడుస్తోంది. ఈ నేపథ్యంలో మేకర్స్ శాటిలైట్ డీల్ సమస్యను ఎలా అధిగమిస్తారో అన్నది ఆసక్తికరంగా మారింది.
నిజానికి మూవీని థియేటర్లలోకి తీసుకురావడానికంటే ముందే థియేట్రికల్ బిజినెస్ తో పాటు డిజిటల్, శాటిలైట్ డీల్స్ పూర్తి చేసుకుంటేనే నిర్మాతలు కొంతవరకు సేఫ్ అవుతారు. థియేటర్లలోకి వచ్చాక ఆ మూవీకి దారుణమైన రెస్పాన్స్ వస్తే డిజిటల్ డీల్స్, శాటిలైట్ డీల్స్ కుదరడం అన్నది చాలా కష్టమైన పని. మరి ఈ పరిస్థితిని నిర్మాత దిల్ రాజు ఎలా చక్కబెడతాడో చూడాలి. ఇక ఎప్పటిలాగే హీరో ఆశిష్ కి ఈ మూవీతో నిరాశ తప్పలేదు.